HATAW! D'yaryo ng Bayan hatawtabloid.com
BINAWIAN ng buhay ang dalawang indibiduwal habang sugatan ang anim na iba pa matapos bumangga ang isang truck na pinaniniwalaang nawalan ng preno, sa isang tindahan ng manok sa bahagi ng A. Bonifacio Ave., Bgry. Barangka, sa lungsod ng Marikina, nitong Sabado, 25 Abril.
Ayon sa Marikina CPS, ang mga namatay sa insidente ay isang 9-anyos na batang lalaki at 26-anyos na binata.
Samantala, kabilang sa anim na sugatan ang driver at pahinante ng truck, 7-anyos at 11-anyos na mga batang lalaki, 33-anyos lalaki, at 59-anyos babae.
Damay din sa insidente ang iba pang mga sasakyan kabilang ang isang Toyota Wigo, dalawang Toyota Fortuner, at isang Isuzu Rebuilt.
Sa paunang imbestigasyon ng Marikina CPS, naganap ang insidente dakong 11:00 ng umaga kamakalawa habang binabagtas ng Toyota Wigo ang outer lane ng A. Bonifacio Avenue.
Biglang lumitaw ang truck sa likod at bumangga sa kaliwang bahagi ng Wigo, saka bumangga din sa kaliwang bahagi ng Fortuner na bumibiyahe sa parehong kalsada patungo sa kabilang direksiyon.
Dahil sa lakas ng pagbangga, sumalpok pa sa isang Fortuner ang naunang Fortuner na bumibiyahe sa parehong direksiyon.
Sa kabila nito, patuloy ang truck sa pag-abante hanggang tamaan ang likuran ng isang Isuzu Rebuilt, at mabangga at masira ang isang bollard sa tabing kalsada pati na ang ilan sa mga biktima bago tuluyang sumalpok sa tindahan ng manok.
Agad na dinala ang mga biktima sa pagamutan habang nasa kustodiya ng pulisya ang driver ng truck.
Hindi nabanggit sa ulat kung ilan ang namatay o napinsalang manok.
Patuloy ang isinasagawang imbestigasyon ng mga awtoridad kaugnay sa insidenteng nagdulot ng masikip na trapiko sa lugar.
