HATAW! D'yaryo ng Bayan hatawtabloid.com
ISANG kaso ng carnapping ang mabilis na naresolba matapos ang agarang aksiyon ng pulisya at ng mga tanod, na nagresulta sa pagkakaaresto sa suspek at pagbawi sa ninakaw na motorsiklo sa Baliwag, Bulacan nitong Lunes, 23 Hunyo.
Sa ulat na isinumite kay P/Col. Franklin Estoro, officer-in-charge ng Bulacan PPO, dakong 10:30 ng gabi nang mangyari ang insidente sa Brgy. Virgen Delas Flores, sa nabanggit na lungsod.
Sa imbestigasyon, iniwan ng biktima ang kanyang motorsiklong Honda Alpha 125, may plakang 635WHN, sa harap ng bahay ng kanyang kasintahan na siya niyang sinundo.
Ilang sandali lamang ay narinig ng biktima ang tunog ng kanyang motorsiklo at nang lumabas ay nakita ang suspek na kinilalang si alyas Tame, 37 anyos, residente sa nabanggit na barangay, habang tinatangka itong tangayin.
Matapos ang maikling habulan, nahuli ang suspek at dinala sa Barangay Hall ng Brgy. Sto. Cristo sa dinala sa Baliwag CPS para sa nararapat na imbestigasyon at dokumentasyon.
Napag-alaman na bagitong karnaper ng motorsiklo ang suspek kaya hindi alam ang pasikot-sikot sa pagtakas kaya madali siyang nasakote ng mga awtoridad.
Kasalukuyang inihahanda ang kaukulang kasong paglabag sa RA 10883 (New Anti-Carnapping Act of 2016) laban sa suspek upang maisampa sa Tanggapan ng Provincial Prosecutor. (MICKA BAUTISTA)
