HATAW! D'yaryo ng Bayan hatawtabloid.com
MA at PA
ni Rommel Placente
KUNG may mga artistang pinalad manalo sa katatapos na midterm election, mayroon din namang hindi sinuwerte sa unang sabak sa politika. Ito ay sina Willie Revillame, Marco Gumabao, at Luis Manzano.
Sino nga ba ang mag-aakala na si Willie, bago ang eleksiyon ay consistent na sa mga survey, na papasok sa mga mananalo sa pagka-senador, pero hindi naman nangyari. Hndi siya nakapasok sa Top 12.
Sa mga artistang sumubok sa politika, isa siya sa mga na-bash nang husto ng mga netizen, lalo na sa usapin ng plataporma na sa mga interview ay sinasabi niyang at saka na lamang iisipin ang plataporma kapag naupo na siya.
Isa pa sa naging issue ay ang programa niya sa TV5 na Will To Win dahil tinapos na ito na ang dahilan ay ang pagsabak niya sa politika.
Pero ngayon nga ay wala na rin siyang babalikang show kaya abangan natin kung anong mga susunod na kaganapan sa kanyang showbiz career.
Si Luis naman, noong una pa lang, ay may mga nagsasabing sa pagtakbo nila ng inang si Vilma Santos at kapatid na si Ryan Christian ay medyo alanganing manalo, dahil sa lakas ng katunggali sa pagka-vice governor.
Ang ending nga sa kanilang pamilya, siya lamang ang hindi pinalad na manalo.
Sure naman na may babalikang career si Luis kaya back to hosting na muna ito at baka naman hindi ito ang panahon para pasukin niya ang politika.
Sa huli, nagpasalamat pa rin siya sa lahat ng sumuporta sa kanya, na kahit hindi siya pinalad na manalo aniya, ay panalo pa rin siya dahil sa mga suportang ipinakita ng taga-Batangas.
Sey naman ng mga netizen kay Marco, bigo na kay Cristine Reyes ay bigo pa ring pasukin ang politika. Kaya naman back to showbiz na lang muna ang aktor. Bata pa naman ito at sumabak na lang ulit next time sa politics.
