HATAW! D'yaryo ng Bayan hatawtabloid.com
BILANG bahagi ng pinaigting na kampanya laban sa mga pinaghahanap ng batas, dalawang most wanted persons (MWPs) ang matagumpay na naaresto ng pinagsanib na puwersa ng pulisya sa magkahiwalay na operasyon sa Bulacan at Angeles City kamakalawa.
Bandang 11:33 ng umaga, sa kahabaan ng Bonifacio Street, Brgy. Población, Sta. Maria, Bulacan, inaresto ng mga operatiba mula sa San Jose Del Monte City Police Station si Reynaldo Gonzales y Jabie, alyas Intoy, 59 anyos, may-asawa, vendor, residente sa Brgy. Fatima IV, CSJDM, Bulacan.
Pangunahing suspek si Gonzales sa pagpatay kay Roderick Constantino, isang insidenteng ayon sa imbestigasyon ay may kinalaman sa alitang may kaugnayan sa ilegal na droga.
Ang operasyon ay isinagawa batay sa warrant of arrest para sa kasong murder sa ilalim ng Criminal Case No. 827-M-2025, na inilabas ni Judge Lyn L. Llamasares-Gonzalez ng RTC Branch 120, SJDM City, Bulacan na walang piyansang inirekomenda.
Sumunod dito, bandang 1:30 ng hapon, naaresto si Jestoni Francisco y Ambay, 23 anyos, residente sa Brgy. Malawaan, Rizal, Occidental Mindoro, sa Bayanihan Park, Brgy. Balibago, Angeles City.
Nahaharap si Francisco sa dalawang kaso ng Statutory Rape sa ilalim ng Criminal Case Nos. R-24-12320 at R-24-12321, na inilabas ni Judge Ruben Evangelista Sevillano Jr., ng RTC Branch 45, San Jose, Occidental Mindoro noong 28 Enero 2025. Walang piyansang inirekomenda sa kanyang kaso.
Ayon kay PRO3 Director P/BGeneral Jean S. Fajardo, ang pagkakaaresto sa dalawang most wanted persons ay resulta ng mas pinaiigting na intelligence coordination at inter-unit collaboration. (MICKA BAUTISTA)
