HATAW! D'yaryo ng Bayan hatawtabloid.com
ALINSUNOD sa kautusan ng Philippine National Police (PNP) Headquarters, isinailalim na sa full alert status ang Police Regional Office 3 (PRO3) mula 12:01 AM ng 3 Mayo hanggang 11:59 PM ng 15 Mayo 2025.
Ito ay bahagi ng mas pinaigting na paghahanda para sa seguridad, siyam na araw bago ang nakatakdang national at local elections sa 12 Mayo.
Ayon kay PRO3 Regional Director, PBGeneral Jean S. Fajardo, puspusan ang kanilang paghahanda upang matiyak ang isang mapayapa, maayos, at malinis na eleksiyon sa buong rehiyon ng Gitnang Luzon.
“Kami ay nakikipagtulungan sa COMELEC, AFP, at iba pang ahensiya ng gobyerno upang matiyak ang kaligtasan ng ating mga kababayan sa araw ng halalan. Ang kapayapaan ng halalan ay kapayapaan ng sambayanan,” pahayag ni RD Fajardo.
Kabilang sa mga direktibang ipinatupad sa ilalim ng full alert status ay ang pag-deploy ng karagdagang pulis sa mga identified election areas of concern at voting centers sa mga lalawigan ng Bulacan, Nueva Ecija, at Pampanga.
Nakahanda na rin ang mga Quick Reaction Forces (QRF) at Reactionary Standby Support Forces (RSSF) upang agad tumugon sa mga insidente ng karahasan o kaguluhan.
Tiniyak ng PRO3 na 24/7 ang kanilang monitoring operations, katuwang ang mga intelligence units, upang agad matukoy at maagapan ang mga banta sa seguridad.
Nanawagan din ang PRO3 sa publiko na makipagtulungan sa pulisya, iwasan ang pagkalat ng maling impormasyon, at agad iulat ang mga kahina-hinalang kilos na maaaring makasagabal sa halalan. (MICKA BAUTISTA)
