HATAW! D'yaryo ng Bayan hatawtabloid.com
WALA nang buhay nang matagpuan ang isang driver ng transportation network vehicle service (TNVS) sa loob ng kaniyang kotseng nakaparasa sa southbound lane ng Miriam Defensor Santiago Ave., sa Brgy. Bagong Pag-asa, sa Quezon City, nitong Lunes, 28 Abril.
Ayon sa Quezon City Police District (QCPD), natagpuang wala nang buhay ang 61-anyos lalaki dakong 6:00 ng umaga, ng isa pang TNVS driver.
Ayon sa paunang imbestigasyon, nakita ng saksi ang biktima na walang malay sa loob ng isang metallic green na sedan kaya agad siyang humingi ng tulong sa mga security guard sa lugar saka iniulat sa pulisya ang insidente.
Walang kahit anong tanda ng pisikal na pinsala sa katawan ng biktima na sasailalim sa awtopsiya upang matukoy ang sanhi ng kaniyang kamatayan.
Ayon kay QCPD officer-in-charge P/Col. Randy Glenn Silva, patuloy nilang iimbestigahan ang insidente.
“Patuloy ang malalim na imbestigasyon ng QCPD upang matukoy ang tunay na dahilan ng pagkamatay ng biktima at upang malaman kung may iba pang indibiduwal na may kinalaman sa insidente,” pahayag ni Silva.
