HATAW! D'yaryo ng Bayan hatawtabloid.com
RATED R
ni Rommel Gonzales
BUKOD sa nipples ni Jerald Napoles na laging nakatayo at sa matambok niyang puwet, nagmarka sa amin ang ipinakitang drama acting sa Sampung Utos Kay Josh ng Viva Films at Studio Viva.
May ibubuga si Jerald sa pag-arte, drama man o comedy, mabigyan lang palagi ng tamang materyal.
Mahirap ang papel na ginampanan niya sa pelikula, hindi lahat ng artista ay kayang itawid ang ginawa niya.
Maging si Pepe Herrera, hindi na kami nagtaka na tinanggap ang papel bilang si Satanas.
Sino ba namang artista ang madadaliang gumanap bilang hari ng mga demonyo?
Pero si Pepe, pasado.
Nagulat kami kay Albie Casiño, kahit magagaling sina Jerald at Pepe, hindi ito natabunan bilang lalaking maelya, maihiin, at todo-pasa sa buhay.
Mahusay siyang suporta kay Jerald, sa totoo lang.
May mga eksena sa pelikula na ikatataas ng kilay, o malamang mapa-sign of the cross ang mga relihiyoso, and expected na iyon.
Pero may mga redeeming factor naman ang mga nakaka-shock na eksena. Sa madaling salita, may mga aral na mapupulot sa pelikula na magpapatunay na kailanman hinding-hindi magtatagumpay ang kasamaan laban sa kabutihan.
Palabas na sa mga sinehan ang Sampung Utos Kay Josh, sa direksyon ni Marius Talampas at panulat ni Sherwin Buenvenida.
