Mga pelikulang may angkop na klasipikasyon mula sa MTRCB, gabay ng pamilyang Filipino sa panood sa mga sinehan ngayong linggo

ALAM MO NA!
ni Nonie Nicasio

BILANG pasakalye sa Chinese New Year, anim na pelikula ang binigyan ng Movie and Television Review and Classification Board (MTRCB) ng karampatang klasipikasyon para sa ikaliligaya ng manonood.

PG (Patnubay at Gabay/Parental Guidance) ang “Her Locket,” na humakot ng 8 awards sa 2024 Sinag Maynila Film Festival.

Ipinaalala ni MTRCB Chairperson and CEO Lala Sotto-Antonio ang paggabay ng mga magulang sa kanilang mga anak sa tamang pagpili ng mga panonoorin.

“Habang may mga eksena na posibleng naglalarawan ng ilang sensitibong paksa, tayo, bilang mga magulang ay laging handa na sagutin ang mga tanong ng ating mga anak,” sabi ni Sotto-Antonio.

Rated R-13 naman ang “Presence” at mga edad 13 pataas lamang ang puwedeng manood nito dahil sa ilang masisidhing eksena.

R-13 din ang “Flight Risk,” “Death Whisperer 2” at “Overlord: The Sacred Kingdom” na may mga temang hindi angkop sa edad 12 at pababa.

Habang ang “Anora,” mula sa libro ni Sean Baker, ay R-18 dahil sa mga eksena, lengguwahe at maselang paksa na bagay lamang sa edad 18 at pataas.

Tiniyak ni Sotto-Antonio sa publiko na ang mga pelikula ay dumaan sa tamang proseso para mabigyan ng angkop na klasipikasyon para sa kapakanan ng mga manonood,  partikular ang mga bata.