Inatado ng sariling anak
ULO NG AMA PINUGOT PUSO ISINABIT SA PUNO

INARESTO ng pulisya ang isang 41-anyos lalaki dahil sa alegasyong pinugutan niya ng ulo at kinatay ang katawan ng kaniyang sariling ama sa loob ng kanilang bahay sa Brgy. Madaum, lungsod ng Tagum, lalawigan ng Davao del Norte, nitong Linggo ng umaga, 19 Enero.

Lumalabas sa inisyal na imbestigasyon na pinagalitan ng biktimang kinilalang si Loloy ang kaniyang anak na si Barlono dahil sa hindi pag-uwi ng kanilang bahay nang ilang araw.

Dahil dito, sinugod ng suspek ang ama gamit ang patalim sa loob ng kanilang bahay.

Nabatid na pinagtataga ni Barlono ang katawan ng kaniyang ama, inilagay ang puso sa isang puno, saka inilagay ang iba pang lamang loob sa kaserola.

Samantala, itinapon ng suspek ang ulo ng kaniyang ama sa ilog at kasalukuyang pinaghahanap pa ng mga awtoridad.

Isinumbong ng mga kapitbahay sa pulisya ang insidente saka dinakip ang suspek ng mga nagrespondeng pulis sa loob ng kanilang bahay.

Narekober ng pulisya ang katawan ng biktima na balot ng putik, dalawang patalim, isang martilyo, at isang pala na pinaniniwlaang ginamit ng suspek sa pamamaslang.

Napag-alamang may sakit sa pag-iisip ang suspek na nahaharap ngayon sa kasong parricide.