Sa NAIA Terminal 1
FETUS IBINALOT SA NAPKIN SAKA ITINAPON SA RESTROOM

NATAGPUAN ang isang human fetus sa east departure restroom ng Ninoy Aquino International Airport (NAIA) Terminal 1 sa Pasay City.

Ayon sa ulat, isang miyembro ng cleaning staff ang naglilinis ng basura sa isa sa mga female restroom noong umaga ng Martes, 6 Agosto 2024, nang matagpuan niya ang isang napkin tissue na basa ng dugo sa isang basurahan sa loob ng isa sa mga cubicles.

Sa masusing pagsusuri, nagulat ang staff member nang matuklasan ang isang fetus na nababalot ng napkin tissue.

Agad na tumugon ang mga miyembro ng MIAA Airport Police Department (MIAA-APD) at ang MIAA Medical Team.

Kinompirma ng MIAA Medical Team, sa pangunguna ni Dr. Donita Arnesto, na ang laman ng basang napkin tissue ay tunay ay isang-buwan-gulang na fetus.

Inilipat ng MIAA-APD ang labi sa Ninoy Aquino International Airport Police Station 1 (NAIA PS 1) para sa angkop na aksiyon at disposisyon. Ang Philippine National Police – Scene of the Crime Operatives (PNP SOCO) ay naroon din upang magsagawa ng forensic investigation.

Samantala, isinasagawa ang isang joint investigation ng NAIA Police Station 1, ng Airport Police Department, at ng Sub Station 8 upang masusing matukoy ang kinaroroonan ng ina ng fetus. (NIÑO ACLAN)