Binawian gn buhay ang isang Indian national matapos baralin ng suspek na nakasakay sa motorsiklo sa Brgy. Camias, bayan ng San Miguel, lalawigan ng Bulacan, nitong Sabado, 29 Hunyo.
Sa ulat mula kay P/Col. Relly Arnedo, provincial director ng Bulacan PPO, kinilala ang biktimang si Gunwinder Singh alyas Michael, 23 anyos, Indian national at kasalukuyang naninirahan sa Brgy. San Jose, sa nabanggit na bayan.
Ayon sa inisyal na imbestigasyon, habang sakay ng kanyang motorsiklo ang biktima ay dumating sa nasabing lugar ang mga suspek na sakay ng isang motorsiklong Yamaha Sniper at biglang pinagbabaril siya nang ilang beses na nagresulta sa kanyang agarang pagkamatay.
Matapos ang pamamaril, tinangay ng mga suspek ang motorsiklo ng biktima at tumakas patungong norte.
Agad na nagsagawa ng follow-up operation ang mga tauhan ng San Miguel MPS upang matukoy ang pagkakakilanlan at pag-aresto sa mga suspek at hiniling din sa Bulacan Provincial Forensic unit na iproseso ang pinangyarihan ng krimen.
Isa sa tinitingnang motibo ng pulisya sa krimen ay inggit sa hanapbuhay na pahulugan at pautang na 5-6 ng biktima. (Micka Bautista)
