HATAW! D'yaryo ng Bayan hatawtabloid.com
ARMADO ng baril ang isang lasing na mister habang nagwawala at naghahasik ng takot sa pagwawasiwas ng armas sa Navotas City, kahapon ng madaling araw.
Sa nakarating na ulat kay Navotas City police chief P/Col. Mario Cortes, nagpapatrolya ang mga tauhan ng Police Sub-Station 2 nang makatanggap sila ng impormasyon mula sa isang concerned citizen hinggil sa isang lalaking lasing habang nagwawala sa Leongson Ext., Brgy. San Roque at armado ng baril.
Agad pinuntahan ng mga pulis ang nasabing lugar kung saan nakita nila ang suspek na nagsisigaw habang may bitbit na baril na nagresulta sa pagkakaaresto sa kanya dakong 3:05 ng madaling araw.
Nakuha sa suspek na si alyas Boy Armado ang isang improvised firearm na kargado ng isang bala ng kalibre .45 kaya binitbit siya sa himpilan ng pulisya at nakatakdang sampahan ng kasong paglabag sa Art. 155 ng Revised Penal Code (RPC) at RA 10591. (ROMMEL SALES)
