Binawian ng buhay ang isang 66-anyos na negosyante matapos saksakin ng kaniyang dating tauhan nitong Huwebes Santo, 28 Marso, sa lungsod ng Lucena, lalawigan ng Quezon.
Kinilala ng pulisya nag biktimang si Andres Derota, 66 anyos, isang negosyante.
Ayon sa imbestigasyon, hindi sinasadyang nagkasalubong ang biktima at suspek na kinilalang si Christian, dating boy sa tindahan ni Derota.
Nauwi sa mainitang pagtatalo ang pagkikita ng dating mag-amo hanggang sa bumunot ang suspek ng patalim sa kanyang bulsa saka inatake ang biktima.
Sinubukan pang tumakbo palayo ni Derota ngunit nahabol at naabutan siya ng suspek saka ilang beses pinagsasaksak ng kutsilyo sa kaniyang katawan.
Tumakas ang suspek habang dinala sa pagamutan ang biktima kung saan siya tuluyang pumanaw.
Kasalukuyang tinutugis pa din ng pulisya ang suspek upang sampahan ng mga nararapat na kaso.
