HATAW! D'yaryo ng Bayan hatawtabloid.com
ni NIÑO ACLAN
KUNG hindi magtatago, wala nang dahilan si Kingdom of Jesus Christ (KOJC) appointed son Pastor Apollo Quiboloy para iwasan ang warrant of arrest na nilagdaan mismo ng Pangulo ng Senado.
Ito ay matapos ipakita sa media ni Senadora Risa Hontiveros ang warrant of arrest na pirmado ni Senate President Juan Miguel Zubiri.
Bago ang warrant of arrest, inihain kay Quiboloy ang isang show cause order, na ayon kay Hontiveros, kahit hindi nakasaad sa rules ay pinagbigyan ang kahilingan ni Senador Robin Padilla, kahit ilang beses nang inisnab ng pastor ang imbitasyon ng senado.
Ayon sa Senadora magandang regalo ang naturang warrant of arrest ngayong ipinagdiriwang ang buwan ng kababaihan para sa mga babaeng inaabuso.
Iginiit ni Hontiveros kung hindi gumawa ng drama si Quiboloy ay hindi sila hahantong sa kasalukuyang sitwasyon.
Umaasa ang senadora na magiging mapayapa ang pag-aresto kay Quiboloy at malayang sasama sa mga tauhan ng OSSA.
Sa sandaling tuluyang maaresto si Quiboloy ay mananatili siya sa isang silid sa tabi ng parking lot ng mga senador at tanging ang kanyang pamilya at abogado ang maaaring dumalaw at makausap niya.
