Ysabel, Sophia, at Elle sa negosyo naman makikipagbakbakan

RATED R
ni Rommel Gonzales

NAKATUTUWA na ang mga kabataan natin ngayon ay mga business-minded at responsable sa murang edad at hindi puro gimik at lovelife ang inaatupag. Perfect example ang Voltes V: Legacy girls na sina Ysabel Ortega, Sophia Senoron, at Elle Villanueva.

Dahil tapos na sa pag-ere sa GMA ang Voltes V: Legacy ay hinarap naman ng tatlong dalaga ang pagnenegosyo. Sa wakas ay binuksan na ang branch nila ng sikat na nail spa and salon, ang Nailandia sa II Terrazo sa Tomas Morato. Katatapos lang ang blessings at grand opening nito na siyempre present ang tatlong dalaga na sina Ysabel, Sophia, at Elle. Naroon din ang may-ari ng Nailandia na sina Noreen Divina at mister niyang si Juncynth Divinagayundin ang special someone ni Ysabel na si Miguel Tanfelix, ang boyfriend ni Elle na si Derrick Monasterio, at ang co-star nila sa Voltes V ang child actor na si Raphael Landicho.