NAHAHARAP sa kasong murder ang isang lalaki matapos pagtatagain ang kainuman sa bayan ng San Ildefonso, lalawigan ng Bulacan nitong Linggo, 22 Enero.
Kinilala ni P/Col. Relly Arnedo, provincial director ng Bulacan PPO, ang suspek na si Alex Suria, 50 anyos, ng Brgy. Upig, sa nabanggit na bayan.
Ayon sa ulat, dakong 6:00 ng hapon kamakalawa, biglang uminit ang ulo ng suspek habang nakikipag-inuman sa hindi pinangalanang biktima sa hindi malamang dahilan.
Napag-alamang mabilis na nagpunta sa kanilang barracks ang suspek, kumuha ng itak at nang bumalik ay ilang beses na inundayan ng taga ang biktima na malubha niyang ikinasugat na dahilan upang bawian siya ng buhay.
Naghihimas na ng rehas na bakal ang suspek sa San Ildefonso MPS Jail na nakatakdang sampahan ng kasong murder sa hukuman. (MICKA BAUTISTA)
