ITINALAGA na bilang bagong Officer-in-Charge ng Bulacan Police Provincial Office si P/Col. Relly Arnedo kapalit ni P/Col. Charlie Cabradilla na nagsilbi ng limang buwan sa lalawigan.
Sa isang seremonya na isinagawa sa Bulacan Provincial Headquarters sa Camp General Alejo S. Santos, sa lungsod ng Malolos nitong Moyerkoles, 7 Setyembre, pormal nang itinalaga ni P/BGen. Cesar Pasiwen, Regional Director ng Police Regional Office 3 si P/Col. Arnedo.
Dating nakapuwesto si P/Col. Arnedo bilang hepe ng Regional Investigation and Management Division (RIDMD) ng PRO1.
Bilang bagong OIC ng Bulacan PNP, nangako si P/Col. Arnedo na gagawin ang kanyang bagong responsabilidad na may dedikasyon at pagmamalasakit.
Binigyang diin niya na ang buong puwersa ng Bulacan PNP, sa pangunguna niya, ay walang kapagurang ipagpapatuloy na gampanan ang maigting na kampanya laban sa ilegal na droga at terorismo, gayundin ang pagbaka sa lahat ng uri ng kriminalidad upang mapangalagaan ang kapayapaan at kaayusan sa buong lalawigan.
Ipinahayag din niya ang matatag na pagpapatupad ng ‘internal cleansing’ at hindi umano niya kokondenahin ang anumang ‘bad apples’ sa kanyang organisasyon.
Karagdagan pang ipinahayag ni P/Col. Arnedo, dadalhin niya ang mabagsik na pagtayo sa mga inisyatibo laban sa krimen habang pinalalakas ang pagsuporta sa peace at security framework ni P/BGen. Azurin na “MKK=K” Malasakit, Kaayusan, Kapayapaan at Kaunlaran na magdurugtong sa “KASIMBAYANAN (Kapulisan, Simbahan, at Pamayanan) Program”. (MICKA BAUTISTA)