Biko business nina Gelli at Ariel big hit sa Canada

MATABIL
ni John Fontanilla

NAPAKABONGGA ng negosyo ng mag-asawang Gelli De Belen at Ariel Rivera sa Canada at ito ay ang kanilang Biko na sobrang mabenta at hit na hit doon.

Kuwento ng talent manager/host na si Lolit Solis na sariling ingredients nina Gelli at Ariel ang kanilang espesyal na biko. Ang mag-asawa ang nagluluto at nagri-ready ng mga order.

Dagdag pa ni  Manay Lolit, “For sure masarap iyon dahil talagang hinahanap ng mga buyer nila, at sosyal ha, sa Canada lang available, hindi puwede bilhin sa ‘Pinas.

“Bongga ! May Canadian visa ang biko ni Ariel at Gelli. ‘Pag wala kang visa, wala kang biko.”

Pagbabahagi pa ni Manay Lolit na bata pa si Gelli ay mahilig nang magnegosyo. “Kahit noong bata pa siya at kasa-kasama ni Janice de Belen sa shooting, ugali niya ang nagtitinda ng kung ano-ano.

“Lalo na ‘pag galing siya sa abroad, bibili siya roon ng mga bagay na alam niya na madali niya mabenta rito.”

Sa sobrang sarap nga ng biko nina Gelli at Ariel ay lagi itong sold out at kailangan mong  mag-advance order para matikman ang kanilang espesyal na biko.