HATAW! D'yaryo ng Bayan hatawtabloid.com
AABOT sa P3.4 milyong halaga ng shabu ang nasamsam ng mga awtoridad sa isang delivery driver nang maaresto sa isinagawang buy bust operation sa Caloocan City, kamakalawa ng hapon.
Kinilala ang naarestong suspek na si Arturo Dela Cruz, Jr., 38 anyos, delivery driver, tubong GMA Cavite at residente sa Gov. Pascual St., Sipac, Navotas City.
Sa inisyal na report, dakong 1:30 pm nang magsagawa ang pinagsanib na operasyong ang mga awtoridad sa harap ng isang Fast-Food store sa kanto ng Loreto St., Brgy 84, Caloocan City.
Isang undercover ang nagawang makipagtransaksiyon sa suspek at nang tanggapin ang marked money mula sa poseur-buyer kapalit ng droga ay agad siyang inaresto ng mga operatiba.
Nakompiska sa suspek ang hindi kukulangin sa 500 gramo ng hinihinalang shabu, may standard drug price na P3.4 milyon at buy bust money na isang tunay na P1,000 bill, at may kasamang boodle money.
Kaugnay nito, pinuri ni NCRPO chief PMGen. Vicente Danao, Jr., ang matagumpay na joint drug buy bust operation ng PDEA at Caloocan City Police na nagresulta sa pagkakaaresto sa suspek at pagkakakompiska ng naturang ilegal na droga.
Binuo ang operasyon ng mga operatiba ng Philippine Drug Enforcement Agency (PDEA), Nueva Ecija Provincial Office, PDEA Bataan Provincial Office, PDEA RO-III RSET sa pangunguna ni AI 5 Christopher Macairap, Bagong Bario Sub-Station 5 sa pangunguna ni P/Lt. Julius Villafuerte, at PMaj. Deo Cabildo, SDEU, Caloocan police sa ilalim ng pangangasiwa ni P/Col. Samuel Mina, Jr.
(ROMMEL SALES)
