Saturday , October 23 2021

Iriga lady mayor inasunto ng PNP sa ayuda ‘scam’

SINAMPAHAN ng Philippine National  Police – Criminal Investigation and Detection Group (PNP-CIDG) ng kasong kriminal at administratibo sa Office of the Ombudsman si Iriga City Mayor Madelaine Y. Alfelor-Gazmen sa paglabag sa Anti-Graft and Corrupt Practices Act at sa Bayanihan to Heal as One Act (Bayanihan 1) dahil sa ilegal na pamamahagi ng ayuda sa Social Amelioration Program (SAP) sa mga di-kalipikadong benepi­saryo.

Kabilang sa mga ire­gu­laridad sa pamama­hagi ng SAP grants ni Alfelor, ang pagbibigay niya ng tig P5,000 cash SAP grants sa mga empleyado ng University of Northeastern Philippines (UNEP), sinabing pag-aari ng kanyang pamilya. 

Gayondin ang pama­mahagi ng cash grants ni Alfelor sa mga kaibigan at kamag-anak na napatunayang, mga may kaya at hindi mga kapos-palad na nararapat makatanggap ng ayuda dahil sa matinding dagok sa kanilang kabuhayan ng pandemya.

Sa pagdinig noong nakalipas na taon ng House committee on good government, inamin mismo nina Dory Carag, Criste Olaso Reynes, at  Deocyl Monte Maninang na mismong si Mayor Alfelor ang nagbigay sa kanila ng SAP grant, at sinabihan ang isa sa kanila na isekreto ang pag-abot sa kanila ni mayor ng ayuda.

Sa nasabing pagdinig, napag-alaman din na sina Marcela Alfelor, Irenea Badiola, at Juanita Esplana ay nakatanggap din ng SAP ayuda na tig-P5000 gayong hindi naman sila nakatira sa Iriga City.

Si Sta. Elena Punong Barangay Rodolfo Pung­tan naman ay sumulat mismo kay Pangulong Rodrigo Duterte para ireklamo ang pagtanggal ni Alfelor ng mga barangay officials sa listahan ng mga mamahagi ng Social Amelioration Cards (SACs)  dahil katunggali sila ng alkalde sa politika. Kailangan ang SACs para makakuha ng SAP ayuda. 

Ang kasong ito ng PNP-CIDG sa ayuda scam ay isa sa mga patong-patong na kasong isinampa laban kay Alfelor at iba pa niyang kasamahan.

Sa kabuuan ay may 16 kasong administratibo, criminal, at sibil si Alfelor na nakasampa ngayon sa Ombudsman at Regional Trial Court (RTC) – Iriga.

Sa kabila ng kasong ito at 15 reklamong kriminal at administratibo na kinakaharap ni Alfelor, nagtataka ang mga taga-Camarines Sur kung bakit hanggang ngayon ay hindi pa rin nasususpende ang alkalde, lalo pa nga’t mismong ang Pangulong Duterte na ang nagpa­hayag na ayaw niya ng kahit anong klaseng kurop­siyon sa pama­mahagi ng SAP.

Sinabi ni Pangulong Duterte na nararapat suspendehin ang mga opisyal na masasangkot sa ayuda scam habang iniimbestigahan ang mga kaso laban sa kanila.

Bukod sa reklamo ng PNP-CIDG, may administrative complaint rin laban kay Alfelor kaugnay ng pag-utang nito ng P275 milyon sa Land Bank of the Philippines (Landbank) para magpagawa ng isang magarbong amusement park sa panahon ng pandemya gayong wala namang makikinabang dito dahil   mahigpit na ipinagbabawal ang pamamasyal dahil sa CoVid-19.

Si Alfelor ay naha­harap din sa magka­hiwalay na kasong malversation at graft dahil sa unliquidated cash advances na P32.84 milyon at P27.89 milyon; sa pagbili ng seedlings na nagkakahalaga ng P13.51 milyon na hindi dumaan sa public bidding, at sa mga undocumented procurement transactions na umabot sa P17.25 milyon.

Dagdag sa mga kaso ni Alfelor, ang malversation at graft case na isinampa sa kaniya dahil sa pagbibigay ng scholarship fund sa halagang P2.78 milyon para lamang sa nag-iisang benipisaryo; ang P14.19 milyong unsupported/undocumented cash advances na napunta sa mga contractor; at  pag­pirma sa isang memo­randum of agreement (MOA).

Isinangkalan umano ng alkalde ang pamaha­laang lungsod ng Iriga para magbayad ng P800,000 participation fee, at P50,000 bond sa isang national basketball league na walang pahin­tulot ng Sangguniang Panglungsod.

Nabisto rin ang hindi niya pagbibigay ng karampatang bahagi ng barangay San Antonio at barangay La Medalla sa real property tax collection ng lungsod at pag-a-appoint sa mga di-kalipikadong empleyado ng pamahalaang pang­lungsod kaya’t lalo pang nadagdagan ang mga patong-patong niyang kaso sa Ombudsman.

 (HATAW News Team)

About hataw tabloid

Check Also

102221 Hataw Frontpage

Bato kabado sa ICC probe vs drug war killings sa PH

ni ROSE NOVENARIO IBINISTO ni Pangulong Rodrigo Duterte na kabado si dating PNP chief, Sen. …

Blind Item, Woman, man, gay

BF ni sikat na aktres boylet din ni batang matinee idol

ANO kaya ang sasabihin ng magaling at sikat na aktres kung makakarating sa kanya ang tsismis …

Aiko Best Supporting Actress sa 34th Star Awards for TV

Aiko Best Supporting Actress sa 34th Star Awards for TV

MA at PAni Rommel Placente ITINANGHAL na Best Supporting Actress si Aiko Melendez para sa mahusay niyang …

‘Party drugs’ distributor sa Bulacan, atbp., timbog sa Marikina

NAKOMPISKA ang may 103 piraso ng ‘ ecstasy ’ na tinatayang nagkakahalaga ng P185,400 mula …

Chest X-Ray

Mga empleyado ng Kapitolyo, PDLs sa Tanglaw sumailalim sa libreng TB screening, chest x-ray

SA LAYUNING mahanap ang mga may aktibong Tuberculosis (TB), maipalaganap ang kaalaman, at mabawasan ang …

Leave a Reply