PATAY ang isang truck driver nang malapitang pagbabarilin sa Paco, Maynila.
Kinilala ang biktima sa pangalang Elbert Silva, sinabing tinapatan ng P100,000 ng mastermind para ipapatay.
Batay sa CCTV footage, nakita si Silva na naglalakad kasama ang dalawa katao papasok ng trabaho nang biglang sumulpot ang isang lalaki sa likod nito at pinaputukan ang biktima sa ulo.
Nakahandusay na ang biktima ngunit muli itong binaril ng suspek sa ulo.
Kinilala ang suspek na isang Nestor Perez, nakita sa CCTV na nanakbo bitbit ang isang bag na may lamang baril papunta sa kasama nitong naka-motorsiklo.
Nagtangka si Perez na tumakas gamit ang isa pang motor ngunit nahabol at kinuyog ng mga residente sa Paco, Maynila.
Agad nahuli ng mga awtoridad si Perez at napag-alamang mula sa Tanauan, Batangas.
Inamin umano ni Perez na nagtungo siya sa Maynila para patayin si Silva dahil sa pangangailangan sa pera.
Dagdag ni Perez, ginawa umano niya ito dahil inalok siya ng kanyang kasamang si Alfredo Curita ng P100,000 para patayin si Silva.
Samantala, nag-alok naman ng pabuya si Manila Mayor Isko Moreno ng P200,000 sa makapagtuturo ng kinaroroonan ni Curita.
