Sanggol pinag-agawan ina patay sa boga ng dyowang ex-US Navy
ARESTADO ang isang retiradong US Navy ng mga awtoridad matapos mapaslang ang kaniyang kasintahang bagong panganak sa Brgy. Macayug, bayan ng Mangaldan, lalawigan ng Pangasinan.
Kinilala ang suspek na si Rommer Gonzales, 40 anyos, isang retiradong US Navy, na nadakip sa kaniyang compound sa Brgy. Embarcadero, sa naturang bayan dakong 4:30 pm, nitong Miyerkoles, 6 Enero.
Positibong kinilala si Gonzales, ng tatlong saksi, na siyang bumaril sa biktimang si Maria Theresa Ambas, 39 anyos.
Ayon sa mga imbestigador, posibleng love triangle at kustodiya ng bagong panganak na sanggol ang motibo sa pamamaslang.
Bago ang pamamaril, napag-alamang nagtatalo sa social media sina Gonzales at Ambas.
Samantala, narekober ng mga operatiba ng Scene of the Crime Office (SOCO) ang limang basyo ng bala ng hindi pa alam na kalibre ng baril.
Nasa kustodiya na si Gonzales ng Mangaldan Police habang inihahanda ang kasong murder na isasampa laban sa kaniya.
