HATAW! D'yaryo ng Bayan hatawtabloid.com
DUDA ang dalawang senador sa nararanasang krisis sa tubig kaya nais nila itong paiimbestigahan.
Sa panayam ng HATAW, kay Senator Christopher “Bong” Go hindi tamang ipasa sa mga mamamayan ang sinasabing problema sa supply ng tubig lalo na’t pumasok ang Manila Water at Maynilad sa kontrata sa gobyerno sa serbisyo sa tubig.
Ganito rin ang pananaw ni Senator Imee Marcos na pinaalalahanan ang Maynilad at Manila Water na dapat paghandaan ang krisis sa tubig para hindi naaapektohan ang consumers.
Ani Go, ang nararanasang krisis sa tubig ng 15.5 milyong kostumer ng Maynilad at Manila Water sa Metro Manila at mga karatig lalawigan ay hindi makatarungan.
Kailangan aniya ang kagyat na pagrepaso sa mga kontrata ng dalawang water concessionaire at kung may mga paglabag ay sampahan ng kaukulang kaso.
Aabot hanggang 15 oras kada araw ang mawawalang ng tubig simula kahapon na posibleng tumagal hanggang sa susunod na taon.
Matatandaan noong nakalipas na Marso ay inatasan ni Pangulong Rodrigo Duterte ang Metropolitan Waterworks and Sewerage System (MWSS) na mag-release ng tubig mula sa Angat Dam na tatagal ng 150-araw supply para tugunan ang water crisis na naranasan ng Manila Water customers.
Nauna rito’y naghinala ang Palasyo na artipisyal ang water shortage na naranasan ng mga kliyente ng Manila Water sa ilang bahagi ng Metro Manila, Rizal at Cavite.
Noong nakaraang Abril, pinatawan ng MWSS ng P1.15 bilyong multa ang Manila Water dahil sa krisis sa tubig na naranasan ng kanilang mga kostumer.
ni ROSE NOVENARIO
MAYNILAD,
MANILA WATER
DAPAT
IMBESTIGAHAN
— IMEE
PINAALALAHANAN ni Senator Imee Marcos ang Maynilad at Manila Water na dapat paghandaan ang krisis sa tubig para hindi naaapektohan ang consumers.
Pahayag ito ni Marcos sa anunsiyo ng dalawang water concessionaires sa ipapatupad nilang rotational service interruptions simula ngayon araw.
Ayon sa senadora, mas mahihirapan ang mahihirap at maliliit na negosyo tulad ng karinderya dahil sa aberya sa supply ng tubig.
Paalala ni Marcos, minsan nang napagsabihan ni Pangulong Rodrigo Duterte ang water concessionaires dahil sa mga kapalpakan sa serbisyo.
Unang nagbanta ang Pangulong Duterte na tatapusin ang kasunduan sa dalawang water distributors kapag hindi inaksiyonan ang krisis sa tubig nitong nakalipas na panahon ng tag-init.
Banggit ni Marcos, binabalak niya na ihirit sa Senado na maimbestigahan ang concession agreements ng Maynilad at Manila Water.
Tinatayang 15 milyon consumers sa Metro Manila, Rizal, Cavite, at Bulacan ang apektado sa aberya sa suplay ng tubig.
(CYNTHIA MARTIN)
