KALABOSO ang tatlong suspek sa pagtutulak ng ilegal na droga na sina Joel Undong, Zaida Pamasag, at Aiza Abdul nang makuhaan ng isa’t kalahating kilo ng shabu na nagkakahalaga ng P3.4 milyon sa ikinasang buy bust operation ng Philippine Drug Enforcement Agency (PDEA) sa FTI Terminal, Barangay Western Bicutan, Taguig City kamakalawa ng hapon. (ERIC JAYSON DREW)

OFW, bebot, 1 pa timbog sa P3.4-M shabu

Jaja Garcia September 9, 2019 News

NAHULIHAN ng 500 gramo ng hinihinalang shabu na nagkakahalaga ng P3,400,000 milyon ang tatlo katao kabilang ang isang overseas Filipino worker (OFW) sa isang buy bust operation sa Taguig City, nitong Sabado.

Nakapiit sa detention cell ng Taguig city police ang mga suspek na sina Joel Undong, 30, tricycle driver; Zainab Pamansag ,27, OFW, at Aiza Abdul ,29.

Base sa ulat ni Taguig police chief P/Col. Alexander Santos, nagkasa ng buy bust operation ang mga tauhan ng Philippine Drug Enforcement Agency (PDEA)

RO-NCR at Station Drug Enforcement Unit (SDEU) sa pangunguna ni P/CMSgt. Arnaldo Pacleb, sa FTI Terminal Arca South, Western Bicutan sa Taguig City, na ikinaaresto ng mga suspek, dakong 2:30 pm.

Sinasabing magkakasabwat ang tatlong suspek nang bentahan ng droga ang poseur buyer sa lugar.

Nakompiska sa mga suspek ang 10 selyadong pakete na naglalaman ng hinihinalang shabu na may standard drug value na P3.4 milyon.

Inihahanda ang kasong paglabag sa Comprehensive Dangerous Drugs Act of 2002 (RA 9165) laban sa mga suspek. (JAJA GARCIA)