Bebot todas sa boga ng nagseselos na Ex
POSIBLENG masidhing panibugho ang nagtulak sa lalaki na barilin ang kanyang dating nobya sa Parañaque City kahapon ng umaga.
Namatay noon din ang biktimang si Gigi Despi, nasa hustong gulang, residente sa Barangay Baclaran sa tama ng mga bala ng kalibre .45 baril sa katawan.
Nagsasagawa ng manhunt operation ang mga awtoridad laban sa tumakas na suspek na kinilalang si Arnel Pareño, 17 De Marso St., Bgy. Baclaran ng lungsod.
Base sa isinumiteng report ni P/Maj. Jolly Soriano, hepe ng Police Community Precinct (PCP-1), kay Parañaque Police chief P/Col. Rogelio Rosales, nangyari ang pamamaril sa tapat ng bahay sa 17 De Marso St., Bgy. Baclaran ng nabanggit na lungsod dakong 9:06 am batay sa ulat na natanggap ng PCP-1.
Agad nagresponde ang mga tauhan ng PCP-1 at dito naabutan ang nakahandusay na katawan ng babae pero wala nang buhay.
Sa isinagawang pagsisiyasat at pagtatanong ng mga nagrespondeng pulis sa ilang nakasaksi ng insidente, sinabing dating nobyo ng biktima ang suspek.
Matagal na umanong hiwalay ang dalawa sa hindi malamang dahilan.
Isa sa sinisilip ng pulisya na posibleng selos o love triangle ang motibo ng pamamaslang.
(JAJA GARCIA)
