HATAW! D'yaryo ng Bayan hatawtabloid.com
HINDI pa man nalulutas ng Quezon City Police District (QCPD) Cubao Police Station 7 ang pagpaslang ng riding-in-tandem sa isang pulis-Crame nitong 21 Hunyo 2019, muling nalusutan ang estasyon nang isa pang pulis ang itinumba, kahapon ng hapon sa Brgy. Valencia.
Sa ulat ng QCPD Criminal Investigation and Detection Unit (CIDU) , patay noon din sa pinangyarihan ng nsidente ang pulis na nakilalang si P/MSgt. Edgar Morada, nakatalaga sa Manila Police District, Ermita Station (PS5).
Patay agad si Morada dahil sa tama ng mga bala sa iba’t ibang bahagi ng katawan.
Patuloy na inaalam ng pulisya ang pagkakakilanlan ng dalawang suspek na sakay ng isang motorsiklo (NMAX) na tumakas nang masigurong napatay nila ang biktima.
Sa imbestigasyon, dakong 12:55 pm nang mangyari ang insidente sa harap ng isang gasolinahan sa kanto ng Granada St., at Valencia St., Brgy. Valencia, QC.
Sakay ng kanyang motorsiklo si Morada nang tabihan siya ng dalawang suspek sakay din ng motorsiklo sa kanto ng Granada at Valencia streets.
Pinagbabaril ng nakaangakas na suspek ang pulis at nang matiyak na patay na ang biktima, tumakas ang tandem, sakay pa rin ng motorsiklo.
Matatandaan, nalusutan din ng tandem ang Cubao PS 7 na pinamumunuan ni P/Lt. Col. Giovanni Hycenth H. Caliao, dalawang linggo na ang nakalilipas makaraang itumba si P/SSgt. Fernando Diamson, nakatalaga sa Intelligence Group sa Camp Crame, sa Boni Serrano Avenue, Brgy. Bagong Lipunan, sakop ng Cubao PS 7.
Nangyari ang pagpaslang kay Diamson, isang araw makalipas ipag-utos ni QCPD Director, P/Brig. Gen. Joselito Esquivel, sa hepe ng 12 estasyon ng pulisya ng lungsod na paigtingin ang kanilang police visibility sa kani-kanilang AOR matapos ipamahagi ang 72 police scooters.
Ang police scooters ay gagamitin sa pagpapatrolya sa bawat sulok ng lungsod para matiyak ang seguridad ng mamamayan ng lungsod maging ang mga nagagawi rito.
Hanggang ngayon, hindi pa nalulutas ang pagpaslang kay Diamson maging ang pagpaslang kay Adam Moraleta, account executive ng Tribune at miyembro ng National Press Club, na itinumba ng tandem sa Brgy. Holy Spirit noong 6 Hunyo 2019. (ALMAR DANGUILAN)
