HATAW! D'yaryo ng Bayan hatawtabloid.com
SINAMPAHAN ng pulisya ng kasong murder ang suspek sa karumal-dumal na pagpaslang sa isang 5-anyos batang babae sa bayan ng Sta. Cruz, lalawigan ng Laguna.
Kinilala ni P/Maj. Jojo Sabeniano, tagapagsalita ng Laguna police, ang suspek na si Glenn Ford Manzanero, 30 anyos.
Kinasuhan si Manzanero dahil sa pagpatay sa nasabing bata na noong Linggo pa naiulat na nawawala sa Barangay Patimbao.
Ayon kay P/Col. Armie Agbuya, hepe ng Sta. Cruz police, huling nakita ang bata habang naglalaro sa labas ng kanilang tahanan at nakita ng ilang testigo na umalis kasama ang suspek.
Nabatid na inalok ng suspek ng maiz con hielo ang biktima upang sumama sa kanya at hindi nag-atubiling sumunod dahil kakilala siyang kapitbahay nila.
Sinimulang hanapin ng mga pulis ang batang biktima matapos isumbong ng kaniyang ina, isang kasambahay, sa pulisya na nawawala ang anak.
Dagdag ni Agbuya, pasado 9:00 pm nang isang kaanak ng suspek na si Manzanero ang nag-ulat na nakita niya umano ang napaslang na biktima sa loob ng kanilang kusina na nakasilid sa loob ng isang malaking kulay pink na bag, gawa mula sa sako.
Ayon sa kaanak ng suspek, may mga saksak ng kutsilyo at ice pick ang leeg ng biktima.
Tinanong umano niya si Manzanero kung ano ang nasa loob ng bag at sinagot naman ng suspek na may babae umano sa loob nito.
Dinakip ng mga pulis si Manzanero na inakong siya ang gumawa ng krimen at sinabing sabog lang siya umano sa shabu nang dukutin ang biktima.
Samantala, hinihintay pa ng pulisya ang resulta ng awtopsiya upang malaman kung ginahasa rin ang biktima.
(BOY PALATINO)
