HATAW! D'yaryo ng Bayan hatawtabloid.com
DREAM come true para kay Ynez Veneracion na makasama sa pelikula ang premyadong aktres na si Ms. Sylvia Sanchez. Magkasama sila sa pelikulang Jesusa na mula sa pamamahala ni Direk Ronald Carballo at prodyus ng OEPM (Oeuvre Events and Production Management).
Sa pelikula ay mag-asawa sina Allen Dizon at Sylvia, ngunit iniwan ni Allen ang kanyang misis nang kumabit siya kay Ynez.
Aminado nga si Ynez na sobra siyang kabado nang nalamang magkasama sila ni Ms. Sylvia sa pelikulang ito. “Dream come true talaga na finally ay nakasama ko na si Ate Sylvia sa isang pelikula, sobra… Although sa TV ay naka-eksena ko na siya, pero iyon ay very-very light lang talaga. Pero itong movie na Jesusa, talagang iba, matindi talaga.
“Kaya nang sinabi sa akin ang project na ito, kinabahan talaga ako, ninerbiyos ako. Sobrang… parang takot na takot ako e, alam mo na siyempre, Sylvia Sanchez iyan, e.”
Dagdag ng dating sexy actress, ”Sa The Greatest Love nga ilan ang awards na nakuha niya? Maraming Best Actress, ‘di ba? Kaya lahat ng mga sinasabi niya, talagang iniisip ko. Kasi gusto kong matuto, kasi naniniwala ako at alam ko na kahit na marunong na akong umarte ay marami pa rin akong dapat na matutuhan. Kaya nakikinig ako sa kanya, kasi sabi ko, ‘Ate willing akong matuto.’
“Sa movie, ang powerful ng mata niya, kaya kinakausap ko ang sarili ko na huwag magpadala kay Ate Sylvia. Kasi, nadadala ako, kumbaga, naaawa ako sa kanya na hindi puwede, kasi kontrabida ka. Kapag naawa ako, iba na ‘yung magiging rehistro ng mukha ko, kaya mate-take two kami. E, very powerful ng mga mata niya e, kaya struggle is real talaga. So, parang naging kalaban ko ang sarili ko. Pero at least, proud naman ako na nakayanan ko iyong struggle talaga,” sambit ni Ynez.
Kasama rin sa Jesusa sina Mara Lopez, Empress Schuck, Malu Barry, Vince Tañada, Mon Confiado, at introducing si Uno Santiago. Planong itaon ang showing nito sa Mother’s Day.
ALAM MO NA!
ni Nonie Nicasio
