NABIKTIMA ang isang pulis ng hindi pa kilalang kawatan matapos pasukin ang kanyang tirahan sa loob ng Camp Bagong Diwa sa Taguig City, kamakalawa ng gabi.
Kinilala ang biktimang si PO3 Roy Guiyab, 32, miyembro ng Philippine National Police (PNP) at nakatalaga sa District Investigation and Detective Management Division (DIDMD) ng Southern Police District (SPD).
Ayon sa ulat ng SPD, 8:15 pm, nang pasukin ng magnanakaw ang bahay ng pulis sa loob ng SPD Quartering, Camp Bagong Diwa, Barangay Lower Bicutan, sa Taguig City.
Nadatnan ng biktima na magulo ang loob ng kanyang unit at nawawala na ang kanyang caliber .9mm pistol Glock 17 Gen 4 na may serial # PNP10184 na nagkakahalaga ng P16, 659; gintong kuwintas na P3,200.00 at P8,000.00 cash na umabot sa kabuuang P27, 859.94.
Patuloy ang isinasagawang imbestigasyon ng awtoridad sa naturang insidente. (JAJA GARCIA)
