SA hindi malamang dahilan, sinaksak sa leeg ang isang 15-anyos na lalaki ng isang suspek sa Makati City, Sabado ng gabi.
Ginagamot sa Ospital ng Makati (OsMak) ang 15-anyos na menor de edad biktima, sanhi ng isang saksak sa kanang leeg.
Pinaghahanap ng Makati City Police ang suspek na kinilalang si Mark Ian Hidalgo, alyas Yaya, nasa hustong gulang, residente rin sa nasabing lungsod.
Sa inisyal na ulat ng pulisya, naganap ang pananaksak sa panulukan ng Maya at Woodpecker streets, Barangay Rizal sa Makati City, dakong 8:30 ng gabi nitong Sabado.
Kasama ng biktima ang kanyang kaibigan na hindi binanggit ang pangalan, nang sumulpot ang suspek na armado ng patalim bago sinaksak sa leeg ang binatilyo sa hindi pa batid na dahilan.
Agad tumakas ang suspek samantala agad dinala ng kanyang kaibigan ang biktima sa nasabing pagamutan na ngayo’y nasa stable o maayos nang kondisyon.
Pormal na naghain ng kaukulang reklamo ang ina ng binatilyo sa tanggapan ng pulisya laban sa suspek.
(JAJA GARCIA)
