ARESTADO ang apat hinihinalang drug personalities sa isinagawang buy-bust operation ng mga pulis sa Caloocan City, kamakalawa ng gabi.
Kinilala ni Station Drug Enforcement Unit (SDEU) chief, S/Insp. John David Chua, ang mga suspek na sina Jacinto Dionisio, 36; Felizardo Bautista, 42; at Richard Tolentino, at Noriel Figueroa, 38-anyos.
Sa imbestigasyon ni PO1 Donn Herrera, dakong 8:30 pm nang ikasa ng mga operatiba ng SDEU ang buy-bust operation kontra kina Bautista at Dionisio sa A. Mabini St., Brgy. 5, Sangandaan.
Nang iabot na ng mga suspek ang isang plastic sachet ng shabu sa undercover police poseur buyer, kapalit ng P500 marked money ay agad dinakip sina Bautista at Dionisio habang nakuha sa kanila ang apat plastic sachet ng hinihinalang shabu.
Dinakip din sina Tolentino at Figueroa nang makompiskahan ng tig-isang plastic sachet ng hinihinalang shabu.
Nakompiska ng mga operatiba ang isang PUV Toyota Innova na may plakang NOS-243, na gamit ni Figueroa.
(ROMMEL SALES)
