Utol ng chairman at police chief nasakote sa Iligan City
NADAKIP sa isinagawang buy-bust operation ang isang high-value target sa Iligan City, nitong Sabado.
Ang suspek ay kinilalang si Antonio Quiros Anduyan Jr., alyas Zuye.
Ang suspek ay nadakip ng mga operatiba ng Philippine Drug Enforcement Agency Region 10 sa Purok 8, Brgy. Tibanga, Iligan City, 6:30 ng gabi.
Ayon kay PDEA Region 10 Regional Director Wilkins Villanueva, ang suspek ay no. 2 sa watchlist ng Iligan City.
Nakompiska sa suspek ang anim piraso ng heat-sealed transparent plastic sachets na may lamang 10 gramo ng hinihinalang shabu, tinatayang P70,000 ang halaga. Narekober din mula sa suspek ang dalawang P1,000 bill.
Kuwento ng mga kaanak ng suspek, nagulat sila nang hinalungkat ng mga taga-PDEA ang lahat ng gamit sa bahay nila nang hindi nila alam ang dahilan.
Kagaya ng mga kapitbahay nila, hindi rin daw nila alam kung ano ang nangyari sa loob dahil lahat sila ay tumakbo sa takot.
Ang suspek ay wala raw trabaho sa ngayon at kapatid siya nina Barangay Captain Camilo Anduyan at Police Chief Supt. Rolando Anduyan.
Sa ngayon, hawak ng PDEA Region 10 ang suspek at mahaharap sa kasong paglabag sa Republic Act No. 9165 (Comprehensive Dangerous Drugs Act of 2002).
