Penalosa giniba si Manufoe sa 2nd round
IPINALASAP ni Dave Penalosa ang lakas ng kamao para gibain sa Round 2 ang kalabang si Ricky Manufoe ng Indonesia na ginanap sa Bohol Wisdom School Gym sa Tagbilaran City.
Unang lumuhod sa canvass si Manufoe sa 1st round dahil sa matitinding body shots ni Penalosa. Nakasalba ito ng round pero muling humiga sa lona ng tatlong beses ang Indonesian sa 2nd round dahil sa matitinding suntok ni Dave kung kaya’t itinigil na ni referee Nic Banal ang laban sa opisyal na oras na 2 minutes at 30 seconds.
“It (sic) really painful. He is very good, the winner,” pahayag ni Manufoe (27-34-3).
Sa panalong iyon ni Dave, anak ng dating kampeon na si Dodie Boy Penalosa, ay nag-imprub ang record nito sa 13-0 na may 9 KOs.
Saludo si Gerry Penalosa sa naging performance ng kanyang pamangkin at nangakong bibigyan ng magagandang laban si Dave.
