TATLONG lalaking hinihinalang sangkot sa krimen ang napatay habang isang ginang ang sugatan nang pagbabarilin ng riding-in-tandem suspects sa magkahiwalay na insidente sa Pasay City kamakalawa.
Kinilala ng pulisya ang mga napatay na sina Fernando Allarse, 36; Richard Amor, 24, kapwa pedicab driver, ng Malibay, Pasay City, at isang ‘di nakilalang lalaki.
Habang nilalapatan ng lunas sa Pasay City General Hospital si Leticia Gapate, 64, tinamaan ng ligaw na bala sa likuran.
Sa ulat ng pulisya, pinagbabaril sina Allarse at Amor dakong 6:00 pm ng dalawang lalaking nakamotorsiklo sa Apelo Cruz St., Brgy. 172, Malibay at minalas na tinamaan ng ligaw na bala si Gapate.
Habang ang ikatlong biktimang hindi pa nakikilala ay pinagbabaril dakong 3 am sa Macapagal Boulevard, Brgy. 76, Zone 10, ng lungsod.
( JAJA GARCIA )
