KALIBO, Aklan – Swak sa kulungan ang isang lalaki nang tangkaing gahasain ang isang turistang Malaysian sa isang hotel sa isla ng Boracay kamakalawa.
Personal na dumulog sa Boracay Tourist Assistance Center (BTAC) si Zhen Hong Chong, 28, upang ireklamo ang tangkang panggahasa sa kanyang kaibigan na si Kia Yew Sia ng hindi muna pinangalanang suspek.
Ayon kay Chong, naabutan niya ang kaibigan na hubo’t hubad at lasing na lasing kasama ang suspek na walang saplot pang-itaas habang nakahiga sa kama.
Nang sumigaw at humingi ng tulong si Chong ay nagalit ang suspek at pilit siyang pinatatahimik.
Nagkaroon aniya ng komosyon sa loob ng hotel room at sinaktan siya ng suspek.
Agad naaresto ng nagrespondeng mga pulis ang suspek na kasalukuyang nakakulong sa lock-up cell ng BTAC.
