Lolang tulak ng droga itinumba

PATAY ang isang matandang babaeng sinasabing tulak ng droga makaraan pagbabarilin ng dalawang lalaki kamakalawa ng gabi sa Malabon City.

Agad binawian ng buhay ang biktimang si Elvira Roxas, 60, residente ng Phase 2, Paradise Village, Brgy. Tonsuya ng nasabing lungsod.

Masusing iniimbestigahan ng mga awtoridad ang insidente upang matukoy kung may kinalaman sa illegal na droga ang insidente at upang mabatid ang pagkakilanlan ng mga salarin.

Sa imbestigasyon ni SPO2 Jerry Dela Torre, dakong 11:30 p.m. habang nasa labas ng kanilang bahay ang biktima nang dumating ang mga suspek at siya ay pinagbabaril at pagkaraan ay mabilis na tumakas lulan ng motorsiklo.

Nabatid sa imbestigasyon ng pulisya, Abril 8 nang balaan ang biktima ng hindi nakilalang mga suspek na tumigil na sa pagtutulak ng droga sa lugar.