P9-M shabu tiklo sa 2 drug dealers

ARESTADO ang dalawang drug dealer, kabilang ang isang negosyanteng Chinese, makaraang makompiskahan ng P9 milyong halaga ng shabu sa buy-bust operation kahapon ng umaga sa Quezon City.

Sa ulat kay Chief Supt. Edgardo G. Tinio, QCPD director, ang nadakip ay sina Paul Co, 44, negosyante, ng 27 Seminary Road, Bahay Toro, Quezon City; at Arvin Caray, 38, family driver, ng 2827 H. Santos, Tejeros, Makati City.

Ang dalawa ay nadakip dakong 5:45 a.m. sa kanto ng Mapagbigay  St., at V. Luna Avenue, Brgy. Pinyahan, Quezon City nang pinagsanib na puwersa ng QCPD District Anti-Illegal Drugs (DAID) at District Special Operation Unit (DSOU).

Ayon kina Supt. Jay Agcaoili, hepe ng DSOU at Chief Insp. Enrico Figueroa, hepe ng DAID, dalawang linggong minanmanan ng kanilang unit ang operasyon ng dalawa makaraang makakuha ng impormasyon hinggil sa kanilang aktibidad.

Nang magpositibo ang impormasyon, ikinasa kahapon ang buy-bust operation at dinamba ng mga operatiba ang dalawa makaraang bentahan ng isang kilo ng shabu ang pulis na nagpanggap na poseur buyer.

Pagkaraan ay nakuha sa loob ng dala nilang kotseng Suzuki Swift ang dalawa pang kilo ng shabu.