Immigration media inasunto ng libel

ISANG nagpapakilalang publisher ng isang tabloid na mayroong natatanging sirkulasyon sa main office ng Bureau of Immigration (BI) sa Intramuros, Maynila ang idinemanda ng kasong libelo sa piskalya ng Pasay City, kamakailan.

Ang kaso laban kay Conrado Ching, Pangulo ng Immigration Press Corpse at sinasabing publisher ng pahayagang The Border, may tanging sirkulasyon sa apat na sulok ng punong tanggapan ng BI sa Intramuros, ay inihain sa piskalya ng Pasay City ng isang babaeng Immigration Officer.

Naniniwala ang nagdemandang Immigration Officer na siya ay sinisiraan at itinitsismis ni Ching, sa kanilang tabloid na makikita sa pahayagang nakalatag sa entrance door ng BI main office tuwing Lunes.

Ang demanda ng IO ay nag-ugat sa pinaniniwalaan niyang paninirang puri ni Ching mula nang ipatapon siya ni Immigration Comissioner Siegfred Mison sa Port of Zamboanga.

Dahil naniniwala ang IO na hindi patas at hindi komportable sa kanyang kalagayan bilang isang single parent ang pagpapatapon sa kanya ni Mison sa border crossing, agad siyang gumawa ng liham para iapela ang kanyang bagong assignment.

Ngunit patuloy umanong tinatanggihan ni Mison ang kanyang apela at paghingi ng konsiderasyon kaya minabuti niyang maghain ng official leave bilang IO, habang nakasalang pa ang kanyang reklamo sa Civil Service Commission (CSC) laban sa sapilitang pagpapalipat sa kanya sa malayong probinsiya.

Sa panayam sa ilang Immigration employees, nabatid na nagpapakilala at inaako ng isang alyas Ching na siya ang publisher ng isang tabloid size na nag-aanyong pahayagan na nakikitang nakalatag sa entrance gate ng BI tuwing Lunes.

Anila, tuwing Lunes, inaabangan nila ang isang pahayagan (hindi ang diyaryo ni Ching) na inilalabas ng ‘mosquito press’ dahil dito nila nababasa ang mga katotohanan at anomalya sa loob ng BI main office at BI-NAIA terminals pero hindi nakukuha ng mainstream media.

Dahil sa kanilang pag-aabang sa nasabing diyaryo ng ‘mosquito press,’ ang tila-tabloid na pahayagan umano ni Ching ay pilit na ibinibigay sa kanila para basahin.

Ngunit kapag kanilang binuklat umano ang diyaryo  ay pawang papuri lang sa isang Immigration official na pawang kapalpakan at kaimoralan ang ginagawa sa bureau.

Wala man lang umanong artikulo sa pahayagan ni Ching na nagbabanggit kung ano na ang tunay na kalagayan ng mga empleyadong ipinatapon sa malalayong lugar gayong ito ay malaking isyu na makaaapekto sa operasyon ng BI sa main office at sa mga airport at subports.

Napipilitan na lang umano silang tanggapin ang diyaryo dahil nakikiusap ang inuutusang namahagi na kunin na nila ang diyaryo saka itago o itabi para ‘maipambalot’ sa panahon na nangangilangan nito.

Naniniwala ang Immigration officer na umasunto kay Ching at sa dalawa niyang kolumnista na sina Vito Barcelo at Ferdie Sevilla na dapat nilang panagutan sa batas ang mga paninirang ginawa sa kanyang pagkatao.