This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
TATLONG Nigerian national at isang Filipina ang naaresto makaraang makompiskahan ng 200 grams ng shabu at isang kilo ng marijuana ng mga operatiba ng Quezon City Police District, District Anti-Illegal Drugs-Special Operations Task Group (QCPD, DAID-SOTG) sa buy-bust operation kahapon ng umaga sa nasabing lungsod.
Sa ulat kay Chief Supt. Edgardo G. Tinio, QCPD Director, ang mga nadakip ay sina Celestine Chukwudozie alyas Hugo, 33, Nigerian national, tubong Anumbra, Nigeria, at residente sa Onelia Jose St., Brgy. Pamplona, Las Piñas City; misis niyang si Frezel, tubong Lanao Del Norte; Johnson Ejiuwa, 27, Nigerian national, residente sa Circle Road, Zapote, Las Piñas City, at Henry Ukpabia, 32, Nigerian national, residente sa Mojica St., Renaville, Pamplona, Las Piñas City.
Ayon kay Chief Insp. Federico E. Figueroa, hepe ng DAID-SOTG, dakong 5 a.m. kahapon nang maaresto ang apat sa harapan ng Shakey’s Restaurant sa Zapote Road, Brgy. Talon Dos, Las Piñas.
Dagdag ng opisyal, nadakip ang apat sa operasyong pinangunahan ni Insp. Manuel Laderas, makaraang bentahan ng mga suspek ang isa sa tauhan ng DAID na nagpanggap na buyer ng shabu sa halagang P200,000.
Nakuha rin sa mga dalang bag ng suspek ang isang kilo ng pinatuyong marijuana bukod sa P200,000 marked money.
