This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
KRITIKAL ang kalagayan sa pagamutan ng isang lalaki makaraan pagsasaksakin ng lalaking tagahanga ng kanyang girlfriend kamakalawa ng gabi sa Malabon City.
Ginagamot sa Tondo Medical Center ang biktimang si Jonathan Hernandez, 27, ng 45 Camus St., Brgy. San Agustin ng nasabing lungsod.
Habang tinutugis ng mga awtoridad ang suspek na kinilala lamang sa alyas na Cookie, ng Mallari St. ng nasabi ring lugar, mabilis na tumakas makaraan ang insidente.
Batay sa ulat ni PO3 Rommel Habig, 11 p.m. nang maganap ang insidente sa Vidal St., Brgy. Ibaba ng lungsod.
Kasama ng biktima ang girlfriend niyang si Romina Dorado habang naglalakad sa lugar nang masalubong nila ang suspek kasama ang tatlong kalalakihan.
Bigla na lamang pinagmumura ng suspek ang biktima at sinabi ng salarin na nagseselos siya dahil kursunada niya ang kasintahan ni Hernandez na nagresulta sa mainitan nilang pagtatalo.
Hanggang sa bumunot ng patalim ang suspek at pinagsasaksak ang biktima.
Pagkaraan ay mabilis na tumakas ang suspek at kanyang mga kasama.
