Allen Dizon, humahataw sa pelikula at telebisyon!

ISA kami sa sumasaludo nang husto sa galing ni Allen Dizon bilang aktor. Na mula sa pagiging sexy actor, napatunayan niya ang kanyang angking talino bilang alagad ng sining. Bukod sa pelikula, pati sa telebisyon ay humahataw na rin ang award winning actor.

Nakakabilib talaga si Allen na bukod sa paghakot ng acting awards, both for local and international competition, pati sa telebisyon ay in-demand na rin siya. Bahagi si Allen sa drama series na Doble Kara ng ABS CBN na pinagbibidahan ni Julia Montes.

Kasama rin sa casts ng Dobe Kara sina Ariel Rivera, Gloria Sevilla, John Lapus, Alora Sasam at ang dalawang leading men ni Julia na sina Anjo Damiles at Edgar Allan Guzman. Ito’y mula sa direksiyon nina Manny Palo at Jon Villarin.

Anyway, sa pelikula naman ay dapat abangan kay Allen ang Iadya Mo Kami with Eddie Garcia, Aiko Melendez, Ricky Davao, at Diana Zubiri at Sekyu na bukod kay Allen ay tinatampukan din nina Sunshine Dizon, Melai Cantiveros, Kiko Matos, at iba pa. Ang dalawang pelikula ay kapwa prodyus ng BG Productions International ni Ms. Baby Go.

Then, nang ianunsiyo ng FAMAS ang kanilang listahan ng nominees for Best Actor para sa kanilang 63rd awards Nite, nominated na naman si Allen. At ang mas matindi, hindi lang sa isang pelikula, kundi sa dalawang pelikula siya nominado!

Nominado si Allen sa mga pelikulang Kamkam (Greed) na pinamahalaan ni Direk Joel Lamangan at Magkakabaung (The Coffin Maker) na mula naman sa direksiyon ni Paul Laxamana. Sa 11 na nominees para sa Best Actor, tanging si Allen lang ang nakakuha ng double nominations.

Kasamang nominado ni Allen for Best Actor sa FAMAS sina Coco Martin-Feng Shui, Daniel Padilla-She’s Dating The Gangster, Derek Ramsay-English Only Please, Jake Vargas-Asintado, John Lloyd Cruz-The Trial, Jorge Estregan-Magnum Muslim .357, Piolo Pascual-Starting Over Again, Robin Padilla-Bonifacio: Ang Unang Pangulo, at Rocco Nacino-Hustisya.

Ayon sa FB post ng manager ni Allen na si Dennis Evangelista, “While both films garnered also majority of nominations in the oldest award giving body, his daughter Felixia Crysten Dizon who got introductory role in Magkakabaung is also nominated for Best Child Performer. Previously, Dizon already won 2 Best Actor for Paupahan and Dukot and 2 Best Supporting Actor for Twilight Dancers and Sigwa at FAMAS. Maraming Salamat Famas!!!”

Congratulations Allen and Dennis and goodluck!

ALAM MO NA! – Nonie V. Nicasio