Ayon kay Senator Tito Sotto, pinagbawalan ng pamunuan ng Eat Bulaga Ang Aldub na mag-endorso ng kandidato sa 2016 elections. Balitang may dalawang presidentiable raw na gustong kuning magkahiwalay na endorser ang Aldub tandem.
Ang AlDub, na sumikat sa Kalyeserye segment ng longest running noontime show sa bansa ay gumagawa ng kakaibang record sa history sa pambihirang kasikatan na tinatamasa nila, sa lakas ng ratings na nakukuha ngayon ng EB, at sa dami Tweets. Ang hashtag na #ALDUBBATTLEForACause ay umabot sa mahigit 5.8 million Tweets last Saturday, September 5.
Sinabi rin ni Sen. Tito na siya mismo ay hindi hihikayatin sina Alden at Maine na mangampanya para sa kanya sa 2016.
“I am setting the example so that politicians will know we mean it. And we do not want our Dabarkads to be politicized,” pahayag ni Tito Sen.
Sa sobrang init ng tambalan nina Alden at Maine, balita namin ay may mga commercials na silang naka-line-up. Makakasama rin daw ang dalawa sa 2015 MFFF entry nina Vic Sotto at Ai-Ai delas Alas na pinamagatang Rom-comin Mo Ako na mula sa direksiyon ni Jose Javier Reyes.
ALAM MO NA! – Nonie V. Nicasio