This site uses cookies for analytics and to improve your experience. By clicking Accept, you consent to our use of cookies. Learn more in our privacy policy.
PATAY ang isang 34-anyos lalaki habang dalawa ang malubhang nasugatan sa banggaan ng dalawang motorsiklo kahapon ng umaga sa Caloocan City.
Hindi na umabot nang buhay sa Bernardino General Hospital ang biktimang si Ramel Regala, ng 22 Pajo, Meycauyan, Bulacan, sanhi ng pinsala sa ulo at katawan.
Habang kapwa nilalapatan ng lunas sa nasabing pagamutan ang nakabanggaan niyang si Mark John Ansuas, 28, at angkas na si Honey Belle Martinez, 17, kapwa residente ng Block 22, Lot 2, Brilliant View, Phase 2, Bagumbong Dulo, Brgy. 171, ng nasabing lungsod.
Batay sa ulat ni PO3 Michael Calora, dakong 5:30 a.m. nang maganap ang insidente sa kahabaan ng Bagumbong Road tapat ng VCM Hardware sa nasabing barangay.
Sakay si Ansuas ng Honda (8250-MJ) motorcycle, angkas ang pamangkin na si Martinez nang salpukin ang minamanehong motorsiklo (UH-1576) ni Regala.
Dahil sa lakas ng salpukan, tumilapon ang mga biktima sa kalsada.
Salaysay ni Ansuas, patungo sila ng pamangkin sa Deparo Road nang biglang mag-counterflow ang biktima dahilan upang magsalpokan ang dalawang motorsiklo.
Patuloy na inaalam ng pulisya kung totoong lasing o nakainom ang namatay na biktima na naging dahilan ng banggaan.
