7-anyos anak ng GRO bugbog-sarado sa kaaway ng ina

NAGA CITY- Bugbug sarado ang isang bata makaraan saktan ng tatlo katao na nakaaway ng kanyang ina sa Lucena City.

Kinilala ang mga suspek na sina Mary Joy Andrade, negosyante; Michael Bacolod Dela Cruz, 39, taho vendor, at Bernardo Palaganas, 46-anyos.

Nabatid na dakong 9 p.m. noong Disyembre 24 nang iwan muna ang batang babae ng kanyang ina sa isang videoke bar na kanyang pinagtatrabahuhan bilang isang GRO.

Ngunit nang makabalik ang ina ay nagulat nang matagpuan duguan ang bata sa loob ng banyo.

Sa salaysay ng bata, hinila ng suspek na si Mary Joy ang kanyang buhok habang si Michael ay piniringan siya sa mata at sinuntok ang kanyang tiyan.

Hindi pa nakuntento, binusalan ni Bernardo ang bibig ng biktima gamit ang isang tuwalya at brown tape.

Binantaan din nila ang biktima na papatayin ang ina ng bata kapag nagsumbong.

Una rito, nagkaroon ng hindi pagkakaunawaan ang ina ng biktima at ang mga suspek.

Nakatakdang sampahan ang mga suspek ng kasong paglabag sa RA 7610 o Special Protection of Children.