HATAW! D'yaryo ng Bayan hatawtabloid.com
COTABATO – Mariing kinondena ni Maguindanao Governor Esmael “Toto” Mangudadatu ang pananambang sa dating alkalde ng Maguindanao na testigo sa karumal-dumal na masaker noong Nobyembre 29, 2009.
Kinilala ang biktimang si Ex-Datu Salibo Mayor Datu Akmad Ampatuan, ama ni Shariff Aguak Municipal Mayor Marop Ampatuan.
Sinabi ni Maguindanao PNP provincial director, Senior Supt. Rudelio Jocson, lulan ang biktima sa kanyang Hilux pick-up kasama ang kanyang mga kamag-anak mula sa Cotabato City pauwi ng kanyang tahanan ngunit pagsapit niya sa Brgy. Macasampen, Guindulungan, Maguindanao ay pinaputukan siya ng hindi nakilalang armadong kalalakihan.
Kahit sugatan si Mayor Ampatuan at dalawa niyang mga kasamahan ay nagawa ng driver na patakbuhin ang kanilang pick-up patungong Maguindanao Provincial Hospital.
Ligtas si Mayor Ampatuan na nasugatan sa kanyang kamay.
Away sa politika o gusto lamang patahimikin si Ampatuan sa pagtestigo niya sa Maguindanao massacre, ang posibleng motibo sa pananambang.
Inatasan na ni Mangudadatu ang pulisya na paigtingin pa ang kanilang imbestigasyon sa naturang pangyayari.
