HATAW! D'yaryo ng Bayan hatawtabloid.com
ISANG espesyal na seremonya ang nilarga ng Purefoods Star Hotdog kasama ang PBA bago ang laro ng Hotshots kontra Barangay Ginebra San Miguel sa Philippine Cup kagabi sa Smart Araneta Coliseum.
Pinagretiro ng Purefoods ang numero 44 ni Jerry Codinera at ang numero 7 ni Rey Evangelista bilang pasasalamat sa kanilang mga kontribusyon sa Hotshots sa kanilang paglalaro sa PBA.
Naunang ini-retiro ng Purefoods ang numero 16 ni Alvin Patrimonio noong 2005 at siya ngayon ay team manager ng Hotshots.
Si Codinera ngayon ay head coach ng Arellano University sa NCAA at ginabayan niya ang Chiefs sa finals ng katatapos na Season 90 men’s basketball ngunit natalo sila kontra San Beda Red Lions.
Si Evangelista naman ay nasa Ormoc, Leyte kung saan inaasikaso niya ang ilang mga negosyo.
“Naging emotional ang reunion naming tatlo nina Jerry and Rey,” wika ni Patrimonio. “Matagal ang pinagsamahan naming dalawa for 12 years sa Purefoods. Si Rey naman, tumagal din siya sa Purefoods tulad ko at doon din siya nag-retire.”
(James Ty III)
