Sana Bukas Pa Ang Kahapon tinalo ang finale ng katapat na serye; lovescene nina Bea at Paulo panalo sa ratings

---

MARAMI ang humihiling na sana raw ay may part 2 ang lovescene nina Bea Alonzo at Paulo Avelino sa Sana Bukas Pa Ang Kahapon.

Pinag-usapan ng viewers ang pinaka-inabangang love scene sa “most tempting episode” ng top-rating drama series ng ABS-CBN na umere noong Biyernes (Setyembre 19).

Sa datos mula sa Kantar Media, humataw ang serye nina Bea at Paulo ng national TV rating na 16.6%, kompara sa nakuha ng pagtatapos ng katapat nitong programa sa GMA na Ang Dalawang Mrs. Real (15.5%).

Bukod sa national TV ratings, humataw din ang Sana Bukas Pa Ang Kahapon sa social networking sites tulad ng Twitter na naging nationwide trending topic ang official hashtag na #SBPAKAlab at worldwide trending topic naman si Paulo dahil sa buhos ng tweets kaugnay ng kontrobersiyal na episode.

Tiyak na mas kapananabikan ng TV viewers ang mga mas umiinit na eksena ng Sana Bukas Pa Ang Kahapon ngayong unti-unti nang nalalantad sa lahat na si Rose (Bea) ay nagpapanggap lamang bilang ang yumaong abogadong si Emmanuelle. Handa na bang harapin ni Rose ang kanyang pamilya at ang mga taong sumira sa buhay niya?

Samantala, ngayong Sabado (Setyembre 27) na lilipad ang Sana Bukas Pa Ang Kahapon stars na sina Paulo at Maricar Reyes para sa espesyal na Kapamilya Karavan ng ABS-CBN Regional para sa Peñafrancia Festival sa Bicol. Ito ay gaganapin sa SM City Naga parking lot, 4:00 p.m..

Sa ilalim ng Dreamscape Entertainment Television, ang Sana Bukas Pa Ang Kahapon ay kuwento ng dalawang magkaibang babae na naghahangad na makamit ang hustisya. Ito ay sa ilalim ng direksiyon nina Trina Dayrit at Jerome Pobocan.

ni Maricris Valdes Nicasio