IPAGHIHIGANTI ng defending champion San Beda Red Lions ang pagkatalong sinapit nila sa Letran Knights sa first round sa kanilang rebanse sa 90th NCAA men’s basketball tournament mamayang 2 pm sa The Arena sa San Juan .
Magugunitang dinaig ng Knights ang Red Lions, 64-53 nang una silang magkita noong Agosto 13.
Sa larong iyon ay hindi ginamit ni coach Teodorico Fernandez III ang 6-8 Nigerian center na si Olaide Adeogun dahil sa pagliban nito sa ensayo.
Humingi na ng paumanhin si Adeogun at hindi na lumiban pa mula noon. Kaya naman nagwagi ang Red Lions ng apat na sunod na laro upang mapanatili ang unang puwesto sa record na 11-2.
Ang Knights ay nangungunyapit sa ikaanim na puwesto sa kartang 6-7 at may manipis na tsansang umabot sa Final Four. Ito ay kung mapapanalunan nila ang natitira nilang laro.
Bukod kay Adeogun, si Fernandez ay umaasa kina Baser Amer, Art dela Cruz, at pro-bound cagers Kyle Pascual, Anthony at David Semerad.
Ang Letran Knights ni coach Caloy Garcia ay pinamumunuan nina Kevin Racal, Mark Cruz, Rey Nambatac at Ford Ruaya.
Ni SABRINA PASCUA
