Shipyard caretaker pinalakol kritikal (Suspek bugbog-sarado)

KRITIKAL ang kalagayan sa pagamutan ng isang shipyard caretaker makaraan palakulin sa mukha ng isang lalaki sa Navotas City kahapon ng umaga.

Isinugod sa Tondo Medical Center ang biktimang si Eddie Dimakulangan, nasa hustong gulang, residente ng Brgy. San Jose ng nasabing lungsod.

Habang bugbog-sarado ang suspek na kinilalang si Alvin Saani, tubong Zamboanga City, at bagong salta sa nasabing lungsod, nahaharap sa kasong frustrated homicide.  Napag-alaman, habang may kinukumpuni ang biktima pumasok ang suspek, bitbit ang isang palakol at biglang hinataw sa mukha si Dimakulungan.

Nang makita ng mga kasamahan ang insidente ay pinagtulungan nilang bugbugin ang suspek bago dinala sa himpilan ng pulisya.  Nabatid na galit ang suspek sa biktima dahil lagi siyang sinisita kapag pumapasok sa compound dahil hindi siya nagtatrabaho roon.

(ROMMEL SALES)