HINDI na umabot nang buhay sa pagamutan ang isang government employee sa Bulakan, Bulacan, habang sugatan ang kanyang kasama makaraan pagbabarilin ng dalawang lalaking lulan ng motorsiklo sa Brgy. Bambang, bayan ng Bulakan, sa lalawigan ng Bulacan kahapon ng umaga.
Kinilala ng pulisya ang napatay na biktimang si Eduardo Martinez, 54, residente ng nabanggit na lugar.
Habang inoobserbahan ang kalagayan ni Angelito Buluran, 44, ng Brgy. Matungao sa bayan ding ito.
Ayon sa imbestigasyon ng pulisya, nagpunta ang mga biktima sa bahay ni Doctor Reynaldo Gloria.
Nakatayo sila sa tapat ng bahay ng doktor nang dumaan ang isang motorsiklo at sila ay pinagbabaril.
Blanko pa ang pulisya sa motibo ng pamamaril ng mga suspek sa mga biktima.
(DAISY MEDINA)
